السلام عليكم ورحمه الله وبركاته النهارده هنتكلم النهارده عن واحدة من انماط MBTI الستة عشر . معانا نمط المهندس ولها كذا اسم منهم العقل المدبر المعماري او INTJ كلهم اسماء لنفس النمط ،نمط شخصية المهندس INTJ واحد من المحللون الاربعة . معني INTJ ؟ هو اختصار ل نمط واحد من ستة عشر نمط من الشخصيات بناء علي مؤشر ماير بريجز MBTI، و INTJ كل حرف بيشير لسمة اساسية من سمات الشخصية الاربعة حرف I رمز ل ( Introversion ) انطوائي وده معنان انه بيشحن طاقته عن طريق الجلوس بفرده في كهفه الخاص حرف N رمز ل (Intuition ) حدسي ومعناه انه بيهتم بالتركيز علي الافكار والمفاهيم بدل من الحقائق والتفاصيل حرف T رمز ل ( Thinking ) عقلاني ومعناه انه بياخد القرارات بناءً على المنطق والعقل حرف J رمز ل (Judging ) صارم وده معناه انه بيفضل التخطيط والتنظيم صفات نمط المهندس INTJ المهندس INTJ هو ثالث اندر نمط بنسبة ٢٪ من سكان الكوكب ، و ٣٪ في الرجال و ١٪ بس من النساء وهي اندر شخصية في النساء . المهندس INTJ هو أحد المحللون انطوائي حدسي عقلاني وصارم . مش بيعتمدو علي اي شخص في حياتهم ، الأولوية الأولي عندهم الشغل
رغم حبي الكبير للغة العربية، الا ان موضوعاتي بيتم كتابتها باللهجه العامية المصرية، وكذالك التعريف عن نفسي وعن مدونة Ruknowledge, علشان كتاباتي تكون بسيطة.
التعريف عن نفسي
بداياتي
انا بحب القرأة والكتابة والبحث، مافيش مجال معين بحب اقرأ فيه.
بديتي في القرأة في عمر ال 10سنوات تقريباً بقصص الأطفال البسيطة الي كلها صور.
وكان في راجل جميل اسمه عمو كمال، كان عنده كشك صغير بيبيع في كتب وجرايد، وكان عامل استعارة كتب وقصص في الصيف للأطفال.
كان كل الي بتعمله انك تاخد كراسة وتروح له بيسأل عن عمرك ويعطيك مجموعة تختار منهم 3او 4 قصص او كتب ويكتب اسمهم في الكراسة، ويعطيهملنا بدون اي ضمانات وبدون اي مقابل تخلصهم وترجع تبدلهم لحد اخر الصيف الي هو بداية الدراسة بنرجع القصص وهكذا كل صيف.
ومع ظهور حملة القرأة للجميع عملت عضوية في مكتبة تابعه للحملة، وكنا بنروح نقرأ وممكن نستعير، واستمرة معايا هواية القرأة الي الآن.
وثم ظهرت هوايتي الثانية البحث، كان اي كلمة تمر عليا مش مفهومة ليا، بكتبها واروح ادور علي كتاب يعطيني معلومات أكثر عنها، ساعات امينة المكتبة تساعدني وساعات ماكنتش بتكون عندها المعلومة نبحث في كتب ايه، الموضوع كان صعب طبعا، وطبعا مع دخول النت بيتنا وجوجل بقي الموضوع سهل جدا بضغطة زرار كل المعلومات بتطلع ولسه الهواية دي عندي.
الكتابة بكتب خواطر وقصص قصيرة وكنت باشتراك في مسابقات مدرسية وساعات بكسب.
لكن بديتي مع الموضوعات الي بكتبها في مدونة Ruknowledge بدات من 6 سنوات تقريبا بحكايات من المثيلوجيا الإغريقية بحكيها لاصحابي، ثم جاتني الجرائة ونشرتها علي احد جروبات الفيس بوك، عجبتهم ولكن انشغلت وبطلت.
ومن سنتين قررت اني اعمل مدونة و لكن الموضوع ما دخلش حيز التنفيذ غير اخر شهر أغسطس 2020
وبدأت افكر في اسم لمدونتي، الموضوع اخد وقت و ورق كتتتتتتير، انا مقررة هكتب عن ايه بس عايزة اسم معبر.
وفي يوم مسكت ورقة وكتبت المدونة هتكون ركن لمشاركة معرفتي، والمكنة طلعت قماش أخيراً،
و ظهرت Ruknowledge.
عن Ruknowledge
عبارة عن دمج لكلمتين ركن باللغة العربية او corner باللغة الانجليزية ، وknowledge باللغة الإنجليزية بمعني معرفة باللغة العربية .
طبعا الاسم لاقي اعتراض واتقال لي يا عربي يا انجليزي لكن الدمج بين لغتين لا لكن في شجعوني وعجبهم ، وكده او كده القرار كان اتاخد وكتبت اول موضوع بتاريخ 13سبتمبر 2020.
مدونة Ruknowledge فيها 3اقسام
أساطير
وهنا هتلاقي فيه أساطير متنوعة من مثيلوجيا كذا حضارة.
منوعات
وظاهر من الاسم مواضيع معلومات عامة عن الحيوان و العلوم او ظواهر و اشياء غامضه او معلومات صحية
شخصيات واحداث تاريخية
هتلاقي معلومات عن شخصيات علشان نتعلم عنها ومنها واحداث تاريخية علشان كمان نتعلم من التاريخ ..